“Ailə Akademiyası” layihəsi çərçivəsində daha bir tədbir
Dekabr ayının 13-də “Aydınlığa doğru” ictimai birliyinin ofisində Bakının Binəqədi rayonunda yerləşən 157 və 144 nömrəli məktəbin direktor müavinləri Nəzakət Məmmədova, Kəmalə Mirzəliyeva və valideyinlərin iştirakilə tədbir keçirildi.
Birliyin rəhbəri Solmaz Əmirli qonaqları salamladı və “Ailə akademiyası” layihəsi haqqında danışaraq dedi ki, bu layihə 3-cü ildir ki, davam edir. Ötən müddət ərzində 130 məktəbdə təşkil olunan tədbirdə 9900-dən çox şagird, 4500-ə nəfərə yaxın valideyn və müəllim kollektivi ilə görüşlər keçirilib, söhbətlər aparılıb .
Sonra təşkiılatın məqsəd və məramını mükəmməl şəkildə özündə əks etdirən 3 dəqiqəlik “Ailə Akademiyasının tanıtım çarxı” iştirakçılara təqdim olundu.
“Pətək” Yeni Nəslin Mənəvi Tərbiyəsi İctimai Birliyini sədr müavini, Rəssamlar İttifaqının üzvü Sevinc xanım Quliyeva çıxış edərək dedi ki, bu gün ailə dəyərləri tənəzülə uğramaqdadır. Beləki ,təkcə elə bu il 24 min ailə dağılıb. Bunun səbəbi nədir, valideyinlər övladlarına həyatı düz başa sala bilmirlər, yoxsa müəllimlər onlara düz yol göstərə bilmirlər? Bəlkə uşaqlarda yalnış dünyagörüşünü internet, aqresiv seriallar formalaşdırır?
Gənc vadeyinlərdən biri dedi ki, məncə uşaqların formalaşmasında ən böyük məsuliyyət valideynin üzərinə düşür. Mən işləyirdim və uşağıma dayə tutmaq imkanım da var idi. Amma fikirləşdim ki, belə etsəm, övladıma əsil ana ola bilməyəcəm. İşlə, pul qazan, onu da ver kiməsə, uşağın da ana nəvazişindən məhrum olsun. Odur ki, işdən çıxdım, övladlarıma da özüm baxdım.
Digər bir valideyin sosial şəbəkələrin uşaqlara mənfi təsirinin acı nəticəsini yaşayan ailələr haqqında bəzi faktlardan danışdı və dedi ki, bizdə internet , ümumiyyətlə yoxdu, televizoru da çox vaxt açmırıq. Çünki bütün kanallarda çığırtı, dava-dalaş…Uşağımızın xatirinə çox vaxt xəbərlərdən də xəbərsiz oluruq.
Müzakirələrdən bu qənaət hasil oldu ki, uşaqların mobil telefonda izlədikləri cizgi filmləri, seriallar-ümumiyyətlə internetdən istifadə istər uşaqların, istər gənclərin psixologiyasına çox pis təsir edir.
“Ailə Akademiyası” layihəsinin müəllifi, əməkdar müəllim, iki dəfə ilin müəllimi seçilmiş Səbinə xanım Rəsulova bildirdi ki, indi texnologiya əsridi, uşaqları internetdən ayrı saxlamaq çətindir. Amma valideyinlər süzgəc rolunu oynamalıdır-yəni “pult” onların əlində olmalıdır, bir şərtlə ki, uşaq bunu hiss etməsin. Bir sözlə, valideyin psixoloq olmalı, uşaqla onun xarakterinə uyğun davranmağı bacarmalı, onun psixikasını mənfi təsirlərdən qorumalıdır.
Sonra valideyinlərə təklif edildi ki, uşaqlarınızla yazılı şəkildə belə bir müqavilə bağlayın: “O, gün ərzində hansı saatda nə iş görəcək, dərslərini hansı saatda hazırlayacaq?” və hər ikiniz müqaviləni imzalayın. Uşaq üçün bu, çox maraqlı olacaq. Ümumiyyətlə, övladlarınızı yaxşı tanımağa, onları öyrənməyə çalışın. Uşaqlarınızla dost olun, onun marağını öyrənin, həmsöhbət olub ona qulaq asın ki, o, sözünü deməyə başqa adam axtarmasın. Bu yanaşmanın uşaqlara çox böyük müsbət təsiri var. Ümumiyyətlə, biz valideyin olaraq birinci özümüzü düzəltməliyik , hər şeydən əvvəl də səbirli olmalıyıq. Çünki, valideyinin övladı ilə münasibətini düzgün qura bilməsi, ona diqqət və qayğı ilə yanaşması uşaqların psixoloji sağlamlığı üçün vacib şərtdir.
Sonra qonaqlara cavablandırmaq üçün suallar paylandı : “Gün ərzində vaxtınızı nəyə və necə bölürsüz”, “Başqalarından nə gözləyir və başqaları üçün nə edə bilirsiz?”.
Tədbirin sonunda qonaqlar görüşdən və aparılan söhbətlərdən çox məmnun olduqlarını bildirərək belə bir layinəni reallaşdırdıqları üçün təşkilat pəhbərliyinə və üzvlərə təşəkkür etdilər.
Mətbuat xidməti